Advent Homilies Year A 2005 - Luvale

					    CALUMINGO CAKAVANGA CAKUVANDAMINA
    KWIZA CAMULWILO WETU YESU KILISHITU
                2005-YEAR B
               Kutanga catete:              Kapolofweto Yisaya 63:16-17;64:1.3-8
               Kutanga camucivali:          Kolinde wakulivanga 1:3-9
               Mujimbu wamwaza:             Mako 13:33-37

                        “PWENU VAKUTONA!”
Natuputuka yino ngonde yakuvandamina kwiza camulwilo wetu yesu Kilishitu uno mwaka na
cihande cimwe cili mumangana etu vose muno mulifuci lyetu lelo. Eci cihande kana cajishimbi
jajihya jamuno mulifuci lyetu. Kuvandamina mulwilo, hilola lumwe tweci kuvandaminanga cishiko
cetu caulwilo; kuvandamina na kuzata kwa kuhambakana kuwaha cakulutwe. Camwenemwene etu
tuvosena tuli nakuvandamina mulwilo namicima yakujinokajinoka mwomwo wacihande cajishimbi
jetu jajihya. Hakupwa vatu vakufwelela muli Kilishitu, luno lola lumwe lwakutwama
nakushinganyeka havyuma muka twemanyinina hakupwa vatu vakwitava mulikilishitu? Evi
vishinganyeka kana vinahase kutuhana cinyingi cakupwa najishimbi jalifuci jinahase kusola ulume
navyuma twazanga cikumakuma. Shikaho kuvandamina camulwilo wetu natucitwala mujila muka?
Tunashinganyeka ngwetu hakutala hacihande cajishimbi jetu jamuno mulifuci lya Zambia, tuhase
kulinga mwaya kusaka camwata wetu shimbu tuli nakumuwandamina.

“Pwenu vakutona!” mumujimbu wamwaza walelo mwata wetu yesu alinakutusanyika mangana
tupwenga vatu vamwe vaze vakutona. Awa mazu kana, anesekesa na ciyoyelo cetu muno mulifuci.
Hakupwa tuvatu valifuci, tuli mujila yakufumisa citupa calipepa cimwe nacipwa namazu akuhanjika
ngwavo “Yetu vatu valifuci lya Zambia………” mazu kana awa apwa mucihanda catete camujishimbi
jetu jamuno mulifuci. Ngwe natutalamo swiiiih nakulihulisa mwayila mazu kanawa kumana
natuwanamo cumamuka mukulihulisa cetu? Eci cuma kana hakucilinga cinakutondeka kulihana
cakuzeneka kuyayavala. Ngwe natutala kanawa ceka wamazu akufwana ngana natuwa ngwe awa
mazu amuyaci kanou anahase kutuhana jingolo jakuzamikisa na kupwa vatu vamwe vakutona.
Vatufunga vetu (Catholic Bishops) mumwaka wa 2004 vasonekele mazu amwe amalemu akufuma
mumukanda wakusokoka ngwavo, “Eca vatu vami vayenga:” tulinakusanyika mutu vosena alitacikiza
ngwenyi ngumuka Zambia, kulihakilako mumulimo wakupwa na jishimbi jetu, keci ngwavo jishimbi
javoko. Omu mukiko mwaya mazu akwamba ngavo, “ Yetu vatu valifuci lya Zambia….”

Twatwama namalonda umwe mukakulama zuvo. Owu mwata kana, wamokomoko, yikiye kwenyi
milimo yamufulumende eca lyehi. Yikiye kwenyi, wala kawafuma hakanwako. Makumbi osena ngwe
ali nakulama zuvo naufuku ayilamina kwenyi mutulo. Ngwe unakasumuka mutulo mwiwva kaha oko
nasavalila, liwvumba lyawala fweteteeeh namitululo ngwe Ndumba namono vikelemi. Veji
vanatulukuka nakwiva vikumba, yikiye numba kwiwva kaze kalungano pimbi.

Mumakumbi awa vanatulukuka kuli veji, anapu mukumbi amwe amakalu nacinyengo cikuma.
Chamwenemwene nangumilweza ngwami, ngwe twapwanga namalonda wakukupuka, keci veji
kavahashileko kutwingilila nakutwivila vikumba.

Hakupwa tuvatu vamwe vakalifuci, katweci nakutonda kuhita muufwaci wavikola vyakufwana
nganako. Ngwenatutala munyima, natuwana ngwe ngwavo kwapwile lola lumwe twasavalile
nakwecelela vikelimi na vilyanyi kutumbwatula. Cacinene omu tuli nakutala ceka hajishimbi jetu
jamuno mulifuci twatela kutala kanawa nameso akukupuka. Munyima, jishimbi jaciulo jinapu
jakuhana jingolo naundumba kuli vatu vamwe. Jishimbi kana eji jinayi mucishimo cakwamba
ngwavo, ‘Kulya kulimpopa kuhokama cisako, vambakulya keci kutetela jimoko.’ Eci cikiko ciyoyelo
                     JESUIT CENTRE FOR THEOLOGICAL REFLECTION
                              "Promoting Faith and Justice"
                                    P.O. Box 37774
                                  10101 Lusaka, Zambia
capwile navakwetu muciyulo. Yetu vatu vapwile nakuyula vatuvulamine. Mukwenu ngwe mukuveta,
kamwe, kaha ceka mwakuveta kamucivali, kumana ngwe mwatonda kukuveta ceka kamucitatu
kaweshi kuhasa kwiwva vomako? VaLuvale vata cishimo ngwavo, ‘Mukwenu mukwamba ove
mukushinganyeka.’

Yino lola mutambi, wakutonda kupwa najishimbi jakufuma kuliyetu vatu hanga waya. Kwesekesa
nakutala muciyoyelo mutunahici munyima natumona camucano ngwetu twapwile mutulo. VaLuvale
vata cishimo ngwavo, ‘Akava uma atoma.’

“Pwenu vakutona!” Eci kutona kana cinalumbunukila mulihi mangana tuhase kupwa najishimbi
jalifuci jinahase kutwimanyinako yetu vatu? Twatela kupwa vatu vamwe vaze vakusokoka
kuvakwetu, kupwa nacinyingi, kononoka, kushishika nakuhona kuliwvimba. Eci nacineha kalemesa
kaumwe namukwavo. Shikangaho tuvosena hakupwa tuvatu vajishimbi, twatela kulihakilako
mangana tutunge jishimbi jetu etu vavene. “Tesa Tumbi, vinuna vili kulutwe.” Mukavatu
ngulinakumihuhumuna ngwami, twetela kupwa vatu vamwe vakutona, shimbu kanda veji vatulukuke
nakutwivila. Tuyenu mwane vaka Chinyama tukasoneke jishimbi jalifuci lyetu mangana tuwane
kuyoya cakutamo. ‘Alya alila zala, atumbika, atumbikila vakwavo.’

Mwata wetu yesu kilishitu nakutuhuhumuna ceka ngwenyi “Pwenu vakukupuka nakutona.”
Tunakulomba ngwatu kusaka camwata wetu Yesu cipwenga nge linongo lyakakahya kakumunyika
mumicima yetu, mangana tuhone kupwa mumilima. Tunakulomba ceka ngwetu, kuunda, zangi, keke,
likoji, kalemesa kaumwe namukwavo, na cinyingi vipwenga mimunyi yetu shimbu tuli
nakuvandamina kwiza camulwilo wetu Yesu kilishitu.

Vihula na vihande mumauka etu amandende (scc)

Kwesekesa nakutala muciyoyelo cami, kakweci vyuma vimwe ngunakuhase kwamba ngwami
ngwavihonene kuvizata mwomwo wakusavala tulo?
Tweci kutonenanga mujila muka ngetunalimbili muvihande vyalifuci naciyulo?
Mujila muka tweci kukafwilangamo vakwetu kupwa vatu vakutona, cacinenenyi numo mungonde ya
kuvandamina kwiza camulwilo wetu yesu kilishitu?

Kuhema

Kunakutondeka, Malonda mukakusavala, owu naseze milimo yenyi mwomwo watulo. Kupwenga veji
navevanga hakumbi hakumbi cakuhona Malonda kwijiva. Mwenya zuvo, mwasulakana cikuma
nakumuhanga owu cifwefwelekete ca Malonda. Yavene wunonyi mwaputuka kulama zuvo yenyi.
Ciyoyelo cacihya naciputuka kuze kuzuvo. Mwenya zuvo mwawahilila mwomwo yikiye nakulama
zuvo yenyi muunyoji

Kulombela ca vakakwitava

Mwangana tuhane cinyingi cakukwitavila mumilimo yetu yakuli sezaseza, mangana tupwenga vatu
vamwe vakutona nakulemesa kusakiwa cava ndumbwetu twalihata navo. Mwangana
tunakulombo……
Mwangana tunakulomba kuwvovuwa kwamicima mangana tuhase kumona nakwitava nge tunaluwisa
omu tulinakuzata. Mwangana tunakulombo…..
Mwangana shimbu tuli nakuputuka yino ngonde yayihya yakuvandamina kwiza camulwilo wetu,
tunakulomba utuhane mwono wijila mangana ututomese muvilinga vyetu. Mwangana
tunakulombo…..




                     JESUIT CENTRE FOR THEOLOGICAL REFLECTION
                              "Promoting Faith and Justice"
                                    P.O. Box 37774
                                  10101 Lusaka, Zambia
   CALUMINGO CA MUCIVALI CAKUVANDAMINA
     KWIZA CAMULWILO WETU 2005 – YEAR B
       Kutanga cakulivanga         Isaya 40: 1-5, 9-11
       Kutanga camucivali          2Petulu 3: 8-14
       Muzhimbu Wamwaza            Mako 1: 1-8

               “YOWANO MUKWAKUPAPATISA
                    HIMWASOLOKA!”
Vatu veci kuhanjikanga ngwavo vatu vamwe vecikunehanga kuwahilila nge naveza, oloze
vamwe veci kunehanga kuwaha nge navaya! Yowano mukwa kupapatisa napu wavamwe
vaze veci kunehanga cisambo nge nasoloka. Vyakutanga vya lelo vinakutulweza momwo
yaka ou mutu, Yowano, apwile wacisambo kosena kuze ayile.

Mukutanga cetu catete, kapolwofweto Isaya anakutambakana ngwenyi: “Ove vanatumu waku
Ziyoni wacisambo, yako helu lyapili. Hanjika kuli vakamembo vosena vamu Yuda ngwove:
Talenu Kalunga kenu ou.’” Yowano ikiye napu lyehi mukwa cisambo vanatumu kuneha
muzhimbu wamwaza ku Zioni. Ceka nawa, mu mazu a Petulu kumukanda wamucivali,
Yowano neza nakutambakana muzhimbu wamwaza cikuma ngwenyi lilu na mavu amahya
avize twapwanga nakuvandamina vineza lyehi kwakamwihi. Mulimo wa Yowano unapu
wakukafwa vana va Isalele mukuvandamina likumbi lya wulwilo lize nalikeza nakwiza ca
Kristu. Yowano natacikiza ngwenyi keci ikiye Mesiyako; mukiko vene ahanjikilile ngwenyi:
“Kuli wumwe alinakwiza hanyima yami, uze nanguhambakana zhingolo; ami kangwatela
kukasununa miha yakumendelo enyiko.” Oloze Yowano atacikizhile ngwenyi ali namulimo
wawunene cikupu, wakuwahisa zhila ya Mwatha wenyi, shikaho.

Muno mulifuci lyetu lya Zambia omo catwama, ngwe kuliwahisa pimbi hakwiza cavula, nge
mande kanda vaci alime mangana apwenga a avovu, meya ecikwizanga navula ka eci kuhasa
kwingila kanawako; oloze naalimwanga kaha nakulyenyeka. Kuhona kuliwahisa hakwiza
cacilika cimwe cinapu lyehi cakuvindama. Yowano mukakupapatisha ezhivile nakutacikiza
kanawa mulimo wenyi mumucano. Ikiye apwile mukakukafwa vatu hakwiza camulwilo. Eci
capwile cilika cacilemu ngoco micima yavatu yatelelele kupwa yakulizamika.

Etu twatela kulihulisa ngwetu: Iyaze mwambata ou mulimo wapwile na Yowano
mukwakupapatisa muno mulifuci lyetu lya Zambia eci hakulinga eci cuma kana cinalisolola
cihone kutuhita. Iyaze mwapwa uze vanatumu wacisambo atambakane mu Zioni ngwenyi
“Kalunga ketu ou”? Iyaze mukwakuzamika nahase kwimana nakutambakana cakuhona
woma nakulweza vaka lifuci lyetu lya Zambia vanapunga nakuyanda hakutonda kupwa na
mukanda wazhishimbi, ngwenyi, “Lola lwenu lwakuyanda nakulinyenga mupambo
lunakumu lyehi”? Ou mulimo kana wunaholokela nahalivaze vatwamina zhetu. Vatwamina
zhetu mufulumende vatela kwimanyinako cikuma kuma vene hakumona ngwavo tupwenga
na mukanda wamwaza wa zhishimbi zhalifuci. Vatetekeli vosena vatela kutacikiza ngavo olu
lusesa lwamwaza ngana tuli nalo lutukafweko kusoneka lushimbi lwamwaza lunakutala
haciyoyelo cavatu.



                    JESUIT CENTRE FOR THEOLOGICAL REFLECTION
                             "Promoting Faith and Justice"
                                   P.O. Box 37774
                                 10101 Lusaka, Zambia
Nganomu capwile kuli Yowano mukwakupapatisa, vatetekeli zhetu vatela kwizhiva ngwavo
omu navakafwa kukusoneka camukanda wazhishimbi, vezhive ngavo vakivo keci vakiko va
milwiloko. Ulwilo ou tuvosena tuli nakutonda weci kwizanga kaha mulizhina lya mulwilo
wetu Yesu Kristu. Mucano vene, kuluwisa cetu cakunyima kacatela kutuhonesako. Mukiko,
kuluwisa kucinapunga, oloze etu twatela kulilongeselaho vimwe; ceka nawa twatela
kumusakwilila Kalunga momu natuhane cinyingi cakwizhiva ngwetu twaluwishile. Eci
kwitava kuluwisa cetu catela kututangisa etu kupwa vakakulikehesa cipwe omu natunhanjika.

Cuma cikwavo natumona kuli Yowano mukwakupapatisa cinapu eci: Yowano apwile mutu
ezhivile oku kwapwile vakulwane zhenyi. Apwile mutu vatumine kuli Kalunga kuli cahanda
cimwe cavatu. Mwomu apwile uze vatumine kuli Kalunga, atelelele kupwa mukalufwelelo.
Ceka nawa muli ikiye, vatu vaze vapwile nakwiza nakwivwilila omu apwile nakutangisa,
vatelelele kuwanamo lufwelelo, nomu apwile nakupapatisa. Mucano vene, momu Yowano
apwile mutu, atelele kuhasa kweca kutangisa nakupapatisa nakupwa nge vaze vafwaliseo na
tupilishitu. Ikiye vene nge asakile kaci apwile nakutwama kanawa na kupwa wazhingolo nge
omu vapwile vatu vamwe. Hamwe cipwe kufwa cenyi kaci kacapwile cakumuteta mutwe
wenyi nakuwuhaka halilongako! Mucano vene eci cinapu cuma cacinene cikuma kuli
vatetekeli haluno lwola tuli nakutonda cikupu kupwa namukanda wazhishimbi zha lifuci
(constitution). Vatetekeli vosena veseke kukavangiza Yowano na kupwa vakononoka kuli
Kalunga ou eci kuvahanjikilanga muzhizhila zhakulisezaseza mukaci kamicima yavo.
Vatetekeli vatela kupwa vatu vamucano kuli vatu vosena vamulifuci, keci kuli vakaluheto
kahako, cipwe vaze vali na zhingolo mumapaatiko (political parties). Mukiko bene, nge
Yowano, twayenu tuvalombeleleko mangana vatukafweko tuliwahise mumicima mangana
olwu lwola kana lupwenga lwamwaza. Mukulinga ngana, vatwamina zhetu navaneha
cisambo nakuwahilila nge naveza, keci nge hinavayako.

Vihula vize navitukafwa mu mauka etu amandende (scc)

   •   Nge yami tetekeli – mutanga, mu SCC, ku ceci (parish), mu ward, cipwe mungalila
       yayinene (constituency) – ngwatela kulinga ngacilihi hakuwahisa zhila ya Mwatha?
   •   Anukenuko lwola lumwe mukuyoya cenu olwu mwapayishile mukwenu cipwe
       kawusoko kenu momwo ya kuhanjika mucano? Vyuma muka vyakavile hanyima?
   •   Kumana kusoloka cetu kuli vakwetu ceci kunehanga cisambo nalufwelelo tahi?

Kuhema

Pwenu natanga yinatwame nazala halwola lwa lunene. Omu lwola lwavula naluswenya
kwakamwihi, visemi valweze vana vavo ngwavo vatela kuzata hamwe halwola lwavula.
Vawahise vyosena vya kuzacisa mulwola lwavula. Kukukumisa kupwenga zhimbuto
zhazhivulu na vya kulya vyavivulu muzuvo. Cisambo nakuwahilila vipwenga muzuvo kana.

Vilombelo vya vakakwitava

   •   Mwangana, tulingise kupwa vatetekeli vamwaza, mangana tupwenga vakakukuzacila va
       mucano mumulimo wove hamakumbi osena. Mwangana tunakulombo….
   •   Mwangana, tupwise vakakuzacila vatu vamucano, mangana tupwenga vatu vanakuneha
       zhingolo mulifuci lyetu lya Zambia. Mwangana tunakulombo….
   •   Mwangana, tulingise kupwa musana wa lifuci na mungwa wakaye, mangana tupwenga vatu
       vanakuneha lufwelelo nakuyoya kuli vaze natuliwana navo. Mwangana tunakulombo….

                    JESUIT CENTRE FOR THEOLOGICAL REFLECTION
                             "Promoting Faith and Justice"
                                   P.O. Box 37774
                                 10101 Lusaka, Zambia
      CALUMINGO CAMICHITATU
 CAKUKUVANDAMINA KWIZA CA MULWILO
               Kutanga catete:                 Isaya 61:1-2, 10-11
               Kutanga camuchivali:            1Theselonyika 5:16-25
               Mujimbu wamwaza:                Yowano1:6-8, 18-19

       ‘‘MUJIMBU WAVYUMEVI WAMWAZA’’
Kungongomweza chalelo hachikolo chami kachapwile nge chamakumbi osena chavyema
chakungulweza kuli ngeji haweluka nduma, chalelo cha lizu lyalindnde lusesa mwane hakusokolola
chikolo kashinakaji waphwevOu hanga nangushishikila mumeso swii, awameso anakungulweza ou
mujimbu waupi. Oukashinakaji hiwumwe wavaze vakakuhutwa. Hakumuhulisa wungeji wenyi, awa
akiko mazu enyi, ‘‘Mwaka wali ngwajimbalisanga mwanAmi waphwevo, nangusela vanginga vatatu.
Umwe wavo vanamusakula kuya mu grade10, nahichi kweseka cha mu grade9, ‘‘Mamalelo’’
Chapwile nge kagwevwilekoko. Ngachilihi ou muchano wakusakula Oumwananginga kuya mu
grade10 nawupwa mujimbu wakuneha ‘‘mamalelo’’? Eyo, mwomwo, ou kaka wapwevo alijino
namulimo wakumutondela mali akufweta kushikola.

‘‘Mwata nangutumu kwambulula mujimbu wamwaza kuli vakakuasuvala.’’Awa akiko mazu
akapolofweto Isaya ali mukutanga chetu chatete anakulumbununa mulimo wenyi. Lelo muno
muZambia, chuma muka nachipwa, ‘‘Mujimbu wa vyumevi wamwaza’’kuli vanasuvala? Chino
chihula twatela kuchikumbulula oholili, mwomwo katwechi kuhasa kutwalililaho lika, shimbu
navyumevi vyatela kupwa mujimbu wamwaza kuvathu , unapu jino kaseloki kakulizakamina na
woma. Mujimbu wa mwaza muka tunahase kwambulula kuli vandumbwetu ava vanakambalala va
maphwevo na vamalunga? Jila yimwe, china tumone ngwetu jishimbi jalifuchi chikupu jipwenga
munyawu wakuneha mujimbu wamwaza, omu nava soneka lusesa lwa vathu nakumoma nawa
ngwavo vana jikavangiza. Mwomwo nge muze vahanjikile tufunga vaLiuka lya Katolika mumukanda
wavo ngwavo, ‘‘Let my people go’’ ngwavo, ‘‘Mumukanda wajishimbi jalifuchi , lusesa law vathu
ukiko muchima wa wajishijimbi jikwavo.’’

Lusesa lwa vathu eji vasoneka mumukanda wajishimbi jalifuchi jatela kuhana vathu vosena
kukasunuka na kusuwuluka. Jishimbi jalifuchi eji vanahichisa kuvathu, halusesa lwa vathu vasoneka
ngwavo, ‘‘Lusesa na kukasunuka cha mutu himutu echi vasoneka muno luli na muthu himutu echi
kavechi kuhasa kumutamula, kaha nawa kavechi kuhasa kukutambulalajo koko chipwe kujishimbi ja
lifuchi.’’

Jishimbi muka, hali eji jishimbi, jajilimu chikuma, eji chipwe fulumende kayechi kuhasa kukutambula
mutu jakusemuka najo? Lumwe lusesa alwe, ‘‘Kala mutu ali nalusesa lwakuya kushikola, kuputukila
pre-primary, primary, secondary .’’ Elu lusesa na jikwavo jajivulu vathu vatela kupwa najo,
fulumende yinalihane mulimo wakumona ngwavo eji jishimbi vana jilemesa nakujikavangiza,
‘‘Fulumende yatela kupwa najijila jakuyitwaminyina nakumona chikupu ngwavo lusesa lwakala
mwana lwa kutanga shikola chakuhona kusakula; nakumona nawa ngwavo kutanga chavana kanda
nachikumina kaha ku secondary, shina, kutwalililaho lwola lwosena kulivosena nakumashikola
akulilongeselako milimo.

Kawechi kuhasa kupwa mujimbu wa mwazako ngana uze kaka ahonene kuwahilila hakusakula cha
muzukulyeni kuya mu Grade10 navakwavo vavavulu hakuhona katachikiza ngwavo fulumende
yinalihane mulimo wakumona ngwavo vana vavo vatela kutwalililaho na kutanga? Kawechi mujimbu
wamwazako kuli vathu vosena vamuno Zambia kutachikiza ngwavo fulumende yavo yalihanyine
kuzachila vathu kechi kaha hakanwa nduma, oloze kuzata na ngolo mangana vathu vamone mihako
                      JESUIT CENTRE FOR THEOLOGICAL REFLECTION
                               "Promoting Faith and Justice"
                                     P.O. Box 37774
                                   10101 Lusaka, Zambia
ya lusesa lwakufwana ngana? Kupwa na valongeshi vakulinangula kanawa vana suuluka nawa na
jifweto javo, jishikola jili navitwamo, mikanda navikwavo vyakukafwako kulinangula kanawa.

Ngachilihi lusesa lwa mutu lwakulikangula chamujimba wenyi kuhichila muvipatela vyamwaza vili
na vandotolo na vitumbo? Kachechi chamwaza kwamba kaha ngwavo vathu vali nelu lusesa,
shimbunyi vitumbo muvipatela vyawuchimo; shimbunyi kuli kaha vakakuzata vavandende vana
nyingika milimo yavo muvipatela vyavinene nevi vyavindende.

Twatachikiza ngwetu kuvandamina chetu kwiza chamuklwilo, hilwola lwakuvandamina nakatalililo
kakanene, uno mwaka, natuvandamina nakatalililo ngwetu kwiza cha Kulishitu wupwenga wana
kulifuchi, ttupwenga najishimbi jalifuchi jize kechi kaha najilemesa kahako, oloze jize najitwala
najishimbi jakutuha kuli Kalunga kulutew na kujilemesa, tuvandaminenu kechi namavoko mushingo
akulishna nduma, shina na michima na vishengenyeka na kukuzata tumone ngwetu kunasemuka
jishimbi jalifuchi jakulemesa na kutwala kulema cha vathu vosena mulifuchi kulutwe, chikumanyi
vakakuhutwa na vakakuhona.

Vihula vyakutukafwako kushengenyeka na kulipangila mumauka etu amandende (scc)

   •   Anukenu umwe wakusuvala mungalila yenu. Chuma muka namumulingila mangana
       chipwenga mujimbu wavyumevi wamwaza kuli ou mutu wakusuvala lelo?
   •   Chuma muka naulihana ulingila mutu umwe wakusuvala kuzomboka yove yino ngonde
       yakuvandamina kwiza cha Mulwilo, mangana mupwenga kambaji wa mujimbu wamwaza?
   •   Wana muka naulombelako tanga yove hakuswenya cha shingishimishi kwaka mwihi?

Vyakuhema

Kwizenga twamina emanyinako ngalileyi muzuvo yajishimbi mwayitambukila, ngalila kaneyi
yipwenga yakuhutwa. Ngalileyi yinakutonda vyuma vyavivulu, oloze uno twamina emanyinako
ngalila anakushengenyeka uno mujila muka mwahasa kumishilamo ano mawukalu amavulu ayino
ngalila. Olozenyi alinalufwelelo ngana ngwenyi jila yakukumishilamo ano maukalu nayisoloka. Jino
uno twamina himwatambula mali akutwala ngalila kulutwe (CDF). Hakuwatambula himwasanyika
vathu vosena vamungalila mangana vashimweitwile kanawa, chuma muka vatela kulinga nawo ano
mali. Vathu jino hinavapwa nakatalililo kavyuma v yamwaza naviza kulutwe.




Vilombelo vyavakwitava

   •   Mwangana, tuhane kuwunda mumichima yetu navishengenyeka vyakuneha kuwunda shimbu
       tunakuvandamina kusemuka chamwanOve mulwilo Yesu Kulishitu, anehe nakulinunga
       hamwe nakulizanga chavathu vosena mukaye. Mwangana tunakulombo, tunakulembelela
       utwivwilile.
   •   Mwangana, tunakulomba ngwetu kwiza cha Kulishitu, shimishimishi yauno mwaka yipwenga
       chivezu chamujimbu waMwaza kuvathu vosena, chachinene kuli vakakusuvala mukachi
       kethu. Mwangana tunakulmbo, tunakulembelela utwivwilile.
   •   Mwangana, tunakulomba ngwetu jishimbi jalifuchi jajihya jipwenga jakukafwako yetu vathu
       vamuno muZambia tupwenga vathu vakulinunga vakuzachila hamwe nakutwala lifuchi lyetu
       kulutwe. Mwangana tunakulombo, tunakulembelela utwivwilile.




                      JESUIT CENTRE FOR THEOLOGICAL REFLECTION
                               "Promoting Faith and Justice"
                                     P.O. Box 37774
                                   10101 Lusaka, Zambia
  CALUMINGO CAMUCIWANA CAKUVANDAMINA
      KWIZA CA MULWILO 2005 - YEAR B
                Kutanga chatete:      2 Samwele 7:1-5, 14, 16
                Kutanga chamuchivali: WavakaLoma 16:25-27
                Mujimbu wamwaza:      Luka 1:26-38

              ‘‘OCO NACIPWA NGACILIHI?’’
Chino hichalumingo chakukumishila kuvandamina kusemuka cha Mulwilo, natutanga
mujimbu omu Kalunga apululwile vathu kuhichila mulufwelelo na kwimika cha phwevo
umwe. Hakwivwa mujimbu wakangelo Ngavaliyele yove naye yaMulwilo, Maliya
akumbwilile nakulikomokela ngwenyi, ‘‘Ocho nachipwa ngachilihi?’’ Muvishengenyeka
vyetu kachahashiwileko Maliya kupwa na mwana, mwomwo apwile mijike. Oloze Kangelo
ambile ngwenyi: ‘‘Mwono Wajila mweza haliyove, kaha jingolo jaOu alitulaho najitwama
hali ove’’ Chuma echi chakukomwesa chasolokele mwomwo chajingolo jaKalunga. Oloze
echi hakusoloka Kalunga azachile hamwe nakulihana cha Maliya.

Hakulinga tumone kuwaha chakusakula Maliya kuli Kalunga twayenu tupwenga na
muvwimbimbi wamaphwevo muchisemwa cha vaYuleya halwola lwa Yesu. Maphwevo
vavamwene nge vikumba vyakulangisa nakulanda kala lwola. Mujizanga maphwevo
kavavetavilile kupwa vinjihoko. Hakulomba na chimene malunga vasakwililenga Kalunga
ngwavo, havyuma vyosena, kangwapwile phwevoko.

Kalunga asakwile ou umwe havathu, kavalemeseleko kupwa naye yamwanenyi. Echi
chapwile chakukomwesa, chikupu chapwile chaungeji muchsemwa chavo. Chapwile nge
Kalunga azangile kutwaminyina jila yakulema nakuvumbika chamaphwevo.Kaha nayipwa
kisu yayinene nawa ngeLifuchi lyetu kuhichila mujishimbi lyalifuchi nalihana kulama na
kutwala kulutwe lusesa lwamaphwevo. Kwosena okwovali, mphwevo kakavulu vechi
kuzatanga nangolo mangana vasolole Yesu, Ou Mulwilo wakaye.

Mumafuchi munapu jijita, maphwevo na vana vakivo vanayanjilamo chikuma. Twecjhi
kumona kakavulu mivwimbimbi ya matunduki vamaphwevo navachina jita, vechi
kutambukanga jitunda jajisuku, navanavavo kunyima, vakwavo kumavoko avo.Tusakwililenu
Kalunga hakuwunda chamono mulifuchi kaha nawa ngwetu echi kuwunda chitwalilileho
nakulutwe. Chikupu ou muchano, jino, nayetu nawa tunakulwa jita yachihande vyachiyulo na
milingu, chisemwa, nahachihande cha kusekasana kulanda nakulanjisa vyuma. Chochimwe
nawa maphwevo na vana vakiko vanakuyanjilamo chikuma hali eyi jita.

Havihande vyamilingu na chiyulo, tunakumona maphwevo hanga navatwalililaho
kuvazachisa kutwala kulutwe kukasa mahunda najisongo javakamilingu. Oloze havihande
vyavilemu, maphwevo kakavulu kavechi kuvahulisakoko, kuvanga kahavaze navevwilila
kuhanjika chavatwamina. Hakutala kanawa twakutwalililaho kumona vyuma vyasonyi
kukina na kwimbila myaso vakavihande vyachiyulo na milingu. Hakwesekesa cha kuyoya
cha muZambia kuli va JCTR mbango yakulinga ngwavo tanga yitwame nakulya kanawa
hakakweji hanga nayiya kulutwe shimbunyi jifweto javatu hanga jinemanyina hamwe,
hamwe najifweto jauchi. Oloze hakutoka cha likumbi maphwevo vakiko vatela kuneha

                    JESUIT CENTRE FOR THEOLOGICAL REFLECTION
                             "Promoting Faith and Justice"
                                   P.O. Box 37774
                                 10101 Lusaka, Zambia
vyakulya kumesa, vawane mali akutwala vana kushikola na chpatela na vyuma vikwavo
vyavivulu. Hali yino jita nawa maphwevo vakiko vanakuyanjilamo chikuma.

Likumbi limwe omungwapwile nakutambuka na ndumbwami, twawanyine phwevo namwana
kunyima, chiteli chikwavo ha mutwe, vikwavo vivali kumavoko enyi. Echi kujanjisa cha
maphwevo, mwomwo ika lunga mwechelela ou phwevo kumbata eviviteli vyosena
ukawenyi? Ou ndumbwami ayileko nakumukafwako ou phwevo kumbata viteli vyenyi,
shimu yami ngwapwile nakushengeka vyakusoneka na kushimwitwilaho. Shimbu tuna hete
kusongo yangone yetu yakuvandamina kwiza chamulwilo wetu, tuzatenu nangolo
kuzomboka kaha kusoneka nakuhanjika kaha mangana tukafweko maphwevo na vana.
Ketwechi kuhasa kukafwa maphwevo vosenakoko, oloze tunahase kukafwako vaze tulinavo
mwakamwihi.

Kanda natuhonako kulombela nakutwalililaho na kuzata nangolo mangana mujishimbi
jalifuchi mupwenga kukinga maphwevo na vana. Shimbu natuvandamina echi chihande
chachilemu, yetu tupwengange Maliya, ‘‘Ocho nachipwa ngachilihi, mwomwo katwechi
naluiheto lwaluvuko?’’ Oloze kuzachils hamwe nazangi nangolo vyuma vyosena vinahase
kupwako.

Vihula vyakutukafwako kulihula mumawuka etu amandende (scc)

   •   Tunahase kwinyikako vyuma vivali vyavilemu vinakuneha chikuma makava ku maphwevo na
       kuvana evi ngalila yetu nyihasa kukumisa? Vyuma muka vinakunehesa awamaukalu?
   •   Hakutala haukalu wetu wauvulu natunjambanjila hamwe na Maliya, ‘‘Oloze echi nachipwa
       ngachilihi?’’ Hachilika chashimishimishi, natuwahilila ngetu Kalunga anakuzata mukayeketu.
       Vyuma muka natulinga uka na kuzachila hamwe na vakwetu mangana tunehe uhashi
       wakuneha kusemuka chamusana wachiyulo, kuwunda, zangi na kulikonekela umwe na
       mukwavo?
   •   Twechi kutondanga jishimbi jamwaza jakututwaminyina mulifuchi. Mujila muka
       natukafwako tunehe uhashi wakusoneka jishimbi jalifuchi mangana chipapilo
       chamakumishilo chikanehe kulinunga, kuwunda kuvathu vosena.

Vyakuhema

Pwenu najitanga jivali. Tanga yakavanga, visemi vosena vavali navalihulisa hakukasa chihande
natanga jinakutwama kanawa valinakulya halikumbi ha likumbi, navanavavo vanakuya kushikola.
Tanga yamuchivali chisemi umwe kaha ikiye mukakukasa vihande, tanga yikutwama hamwwe
chakuhona kulya vana vavo hamwe vaneche shikola, chikumanyi mwana waphwevo.

Vilombelo vyavakakwitava

   •   Mwangana, kisula maphwevo vosena navana vali mungalila yetu namukaye. Chinjikizo
       caMaliya netu chivatwaminyinenga nakuvahana ngolo. Mwangana tunakulombo,
       Tunakulembelela utuvwilile.
   •   Mwangana, tala havathu vamalunga vosena kaha uvahane michima yakunangakana na
       kumona uhashi wamilimo ya maphwevo na vana. Mwangana tunakulombo, Tunakulembelela
       utwtvwilile.
   •   Mwangana, tukafweko tuzachile hamwe nawana wove mukulihana chetu mangana lifuchi
       lyetu lipwenga najishimbi jamwaza nakuyoya chakulutwe chamwaza.


                     JESUIT CENTRE FOR THEOLOGICAL REFLECTION
                              "Promoting Faith and Justice"
                                    P.O. Box 37774
                                  10101 Lusaka, Zambia

				
DOCUMENT INFO
Shared By:
Categories:
Tags:
Stats:
views:31
posted:7/29/2011
language:Swahili
pages:8