The Book of Jude in easyShona

Document Sample
The Book of Jude in easyShona Powered By Docstoc
					         Tsamba yaJudasi muchiShona

         Kwaziso

1. Judasi, muranda waJesu Kristu, munun’una waJakobo,

   kunavakadanwa,       vakadikanwa        munaMwari          Baba,

   vakachengeterwa Jesu Kristu:

2. Ngoni, norugare, norudo ngazviwanzwe kwamuri.


         Vadzidzisi venhema

3. Vadikanwa, ndakati ndichishingaira zvikuru kukunyorerai

   pamusoro    pokuponeswa      kwedu    tose,    ndakavona    kuti

   ndinofanira kukunyorerai, ndichikurairai kuti murwire kwazvo

   kutenda kwakadai kupihwa vatsvene kamwe.

4. Nokuti kunavamwe varume vakapinda pakavanda, vakagara

   vaisirwa   kare   kutongwa   uku,    vanhu    vasingadi   Mwari,

   vanoshandura nyasha dzaMwari wedu vachidziita vutere,

   vachiramba Tenzi uyu mumwe chete, Ishe wedu Jesu Kristu.

5. Zvino ndinoda kukuyevuchidzai, kunyange maizviziva henyu

   kamwe kare zvose, kuti Ishe, wakati amborwira vanhu

   munyika yeEgipita, akazoparadza avo vakanga vasingatendi.
6. Navatumwa, vasina-kuchengeta hukuru hwavo, asi vakasiya

   pavaifanira kugara, wakavachengeta muzvisungo zvisingaperi

   pasi perima guru kusvikira pakutongwa kwezuva guru;

7. seSodoma neGomora, namaguta akapoteredza, akazvipa

   kwazvo saivo kuhupombwe nokutevera imwe nyama, akaitwa

   chiratidzo, akarohwa nomwoto usingaperi.

8. Kunyange zvakadaro, vanhu ava pakurota kwavo, vanosvibisa

   nyama yavo saizvozvo, vachiramba hukuru, nokutuka avo

   vanekubwinya.

9. Asi Mikaeri, mutumwa mukuru, nguva yaakarwa naDiaborosi,

   akaita nharo naye pamusoro pomuviri waMosesi, wakatya

   kumupa mhosva namashoko okutuka, asi wakati: Ishe

   ngaakuraire.

10. Asi vanhu ava vanotuka zvavasingazivi; napazvinhu izvo,

   zvavanonzwisisa   kubva    pakuberekwa     kwavo,   semhuka

   dzisingazivi, vanoparadzwa pazviri.

11. Vanenhamo, nokuti vakafamba nenzira yaKaini, vakapengera

   kukutsauka kwaBarami nokuda kwomubairo, vakaparadzwa

   nokukakavara kwaKora.
12. Vanhu ava mabwe akavanzika pamitambo yenyu yorudo, kana

   vodya nemi vasingatyi, vafudzi vanongozvifudza ivo; makore

   asine     mvura,     anotinhwa       nemhepo;   miti     yechando

   isinezvibereko, yakafa kaviri, yakadzurwa nemidzi;

13. mafungu egungwa anopenga, anopupuma nyadzi dzawo;

   nyeredzi     dzinofamba-famba,        vakachengeterwa     kusviba

   kwerima nokusingaperi.

14. Enoki, wechinomwe kubva kunaAdama, wakaprofitera ivava,

   achiti: Tarira, Ishe wakavuya navatsvene vake vanezvuru

   zvamazana,

15. kuti atonge vose, nokurova vose vasingadi Mwari pamusoro

   pamabasa avo ose okusada Mwari, avakaita nokusada kwavo

   Mwari, napamusoro pamashoko ose makukutu akataurwa

   navatadzi vasingadi Mwari.

16. Ivo    vanun’uni   navasingatendi    nezvavanazvo,     vanofamba

   nekuchiva      kwavo;    (miromo      yavo   inotaura    mashoko

   okuzvikudza), vachikudza vanhu nokuda kwokufumiswa.


           Vatendi ngavakure pakutenda, napakunyengetera,

           naparudo

17. Asi imi vadikanwa, rangarirai mashoko akadayi kutaurwa

   navaapostora vaShe wedu, Jesu Kristu;
18. kuti    vakakuvudzai    kuti     nenguva    yekupedzisira    vaseki

    vachavako, vanofamba nokuchiva kwavo vasingadi Mwari.

19. Ndivo vanoparadzanisa, ndovenyama, vasinoMweya.

20. Asi     imi   vadikanwa,        muzvivake    pakutenda      kwenyu

    kutsvene-tsvene, munyengetere muMweya Mutsvene,

21. muzvichengete murudo rwaMwari, muchitarira ngoni dzaShe

    wedu, Jesu Kristu, muve nohupenyu hwusingaperi.

22. Ivai nengoni navamwe vanenyunyuto,

23. muvaponese muchivabvuta pamwoto; vamwe muve nengoni

    navo nokutya, muchivenga kunyange nenguvo yakasvibiswa

    nenyama.


            Kuvonga

24. Zvino    kunaiye     unogona      kukuchengetai,   kuti     murege

    kugumburwa,        nokukuisai     pamberi    pokubwinya     kwake

    musina-chamungapomerwa, muchifara kwazvo,

25. kunaMwari iye mumwe, Muponesi wedu, naJesu Kristu, Ishe

    wedu, ngakuve kubwinya, nohumambo, nesimba, nohushe,

    nguva isati yavapo, nazvino, nokusingaperi. Ameni.

				
DOCUMENT INFO
Shared By:
Stats:
views:5
posted:3/12/2009
language:English
pages:4