Documents
Resources
Learning Center
Upload
Plans & pricing Sign in
Sign Out

mumbai mizo association

VIEWS: 103 PAGES: 2

									           Mumbai Mizo Association
                                                                           ESTD 1983
President: R Lal Rinawma                                Vice President : Lalthuamliana
General Secretary: David Sinate           Asst. General Secretary: Lalthanpuia Hauhnar
Treasurer: Joshua Lalrempuia
                                                          Website: www. Mumbaimizo.org

November 27, 2005

                      MUMBAI MIZORAM HOUSE CHUNGCHANG

Kumin July ni 31 a hawn a nih atanga vawiin ni thlengin Mumbai Mizoram House chu
cancer damlo leh anmahni kalpuitute chuan room awl awm hman hauh lovin an la luah
khat chho reng a. He House thar hi sawrkar mite duty pawimawha kalte thlenna tur a
nih laiin DAMLOTE CHU NGAIH PAWIMAWH BIK (PRIORITY PEK) AN NI A.
Hetianga damlote lainatna dik tak neia sum tam tak senga an chenna tur buatsaihsak hi
State dangte zingah ti an awm ve lova. Mizoram sawrkar chauh hi hetianga hma la
awm chhun a ni. Chawimawi pawh a phu takmeuh a, a chhawrtute lam atanga
lawmthu sawina erawh chu chanchinbu lamah chhiar tur a vang hle lawi a.

He House thara thlengte ei leh in tur buatsaih kawngah sawrkar lam atanga thil la tihfel
nghal zung zung a remchan loh avangin ( GAD lam pawh an rawn chet thuai beisei ila
)he hmuna thlengte hian inthawhlawmin ei leh in an inngaihtuah chawp thin a. Tun
hnaiah hian hetianga inrelbawlna fel zawk an neih theih nan he hmuna chengte chuan
MIZORAM HOUSE WELFARE COMMITTEE an din a. An hnathawh tur an chhawpte
chu hetiang hi a ni: 1) Ei leh in tur ngaihtuah; 2) Thawhlawm thawh khawm tur intuk
leh a tul anga eitur lam khawm; 3) Thenawmte tana hnawksak leh awmhlei lo tura
invawn that; leh 4) House a zan inkhawm huaihawt te a ni. Keini Mumbai Mizo
Association, he House a lo awm theih nana a tir atanga thahnemngai taka thawktute
chuan hetianga inrelbawlna fel tak an buatsaih hi tha kan tiin lawmawm kan ti a. A bik
takin a chengte hian invawnna fel tak an neih hi a tul em em reng a. He House-a
mikhual thleng tawh phawtte chuan he committee thu leh hla hi ngaichang fo turin kan
chah duh bawk a ni. Tin, ei leh in tur ngaihtuahna kawnga sawrkarin thil a ruahman
fel hnuah pawh inrelbawlna point pathumna leh palina te hi chu chhunzawm zel thei
se kan ti hle a ni.

LIAISON OFFICER THUNEIHNA A INRAWLH CHUNGCHANG

Tin, he House enkawl tur hian Mizoram sawrkarin Officer ( Liaison Officer ) a dah a.
House enkawl leh rorelna tul zawng zawng chu he officer hian a hma vek a.
Amaherawhchu, Damlo kalpuitu thenkhatte hian ‘Mikhual’ ( Guest ) an nih
theihnghilhin kawng tam takah inrawlh an tum thin a. Entir nan, sawrkarin a dah,
Liaison Officer chanpual, room sem leh room booking thlenga lo inrawlh a thuneihna lo
inpek tum an awm thin a. Tun hnuah chuan hetiang hi awm tawh lo se a lawmawm hle
ang. Tin, House Welfare committee ten hnathawh tur chi 4 an inpek bakte hi pelh loh
ni bawk se.

He House-a thleng turin GAD ( Civil Secretariat ) hnenah booking tih hmasak a tul a,
chu chu mi tam takin an zawm tha lova. Room inchuh deuh changte pawh a awm thin
a. Hei pawh hi a dik lo a ni. Tin, mi thenkhat, GAD pawh kaltlang duhlo leh House a
khat tawh chung pawha, nihna emaw hotu lian hnaivaite chhuanga rawn palzut tum an
awm bawk a, chu mai bakah duh ang anga thil tih theih loh avanga hotu sang lama hek
chingte an awm bawk tih kan hria a. Hetiang thil hi awm leh tawh lo turin MMA
chuan kan duh hle a ni. Thurawn tha petute erawh chu khawi hmunah pawh an hlu
thung a.

PU P.C JOHN DINHMUN LEH HNA CHANPUAL SAWI CHIANNA

Damlo Khualbuk, Naporel Tower, Bombay Dyeing Mill Compound hmuna August 1,
2002 a Mizoram sawrkarin a dah atangin Pu John hi Damlo Khualbuk enkawl tura a
dah niin vawiin ni thlengin chhawr zui a ni a. A hna hi hna nghet lo, contract system a
chhawr a ni. A hnathawh tur bera sawrkarin a tuk chu Damlo Khualbuk tha taka
enkawl a ni a. House thar awm hnuah pawh chutiang deuh tho chuan House thar
enkawl tura mawhphurhna pek a ni a, a hna chu Liaison Officer tawiawm leh tanpui a
ni. Amah mi tha leh fel tak, mite tanpui duhna tlawmngaihna nei tha tak a ni a. A
remchangah inentira Mizo lo kal, tanpui ngai zualbik, hindi leh saptawng thiamlote
kaihruaiin a tanpui thin a. Engemaw chang phei chuan rei tak buaipui chang a nei thin.
Hei hi a hna bak, a mimal tlawmngaihna liau liau a ni. Pu John-a chungchangah hian
mi tam takin Tata Hospital leh hmun danga thil tihtur awm zawng zawng buaipui a
tlankual tur te, airport a mi hmuak tur te leh air ticket lei tura tirhkah tur emaw tih
ngaihdan nei nghet an tam tawh niin a lang a. Phili fe a tlankual tir a nih thin avangin
House enkawlna kawnga a hnathawhtur a balhlah chang a awm thin a. He lai thil hi
hriat fiah a tul a. Pu John-a hi sawrkar hnathawk dang ang bawk a thawh tur nei,
hotute thu leh hla ngaichang tur a ni a. Hemi chungchangah bawk hian mikhual
thenkhatten Liaison Officer kal kan a duh dan dana Pu John-a engkima tirh kah leh a
chunga thuneih tum zawkte an awm tih kan hria a. Hei hi a fel lo hle in MMA chuan a
hria a. Amah Pu John tan ngei pawh harsatna la siam theitu a la ni dawn tih kan hriat
thar a hun bawk a ni.

Mizoram House hi fel leh tluang taka enkawl a nih hi keini Mumbai Mizo Association
te hian kan duh tak meuh a. Sawrkar ta a nih angin enkawlnaah pawh sawrkarin dan a
siam te procedure fel tak nena kenkawh a nihna tura kawng hnawk siamtu ni lo turin
mikhual thlengte hian dawhtheihna nei fo turin kan ngen a ni.


                                                                       DAVID SINATE
                                                                      General Secretary

								
To top