abafana bayaxhaphazana

							     Bafana yekani ukuxhaphaza amantombazane!


Uma sikhuluma ngegama xhaphaza , kusuke kukhulunywa ngento esentshenziswa
wumuntu budlabha ngokungayicabangeli noma ngokungayizweli ubuhlungu, futhi
lokho isikhathi esiningi uma kusuke kuphatha leligama xhaphaza, kusuke kwenziwa
wumuntu osezingqondweni zakhe zonke okuwukuthi usuke ekuhlosile ukuthi
asebenzise noma aphathe budlabha lokho akusuke ekuphethe budlabha
ngalesosikhathi, okufaka phakathi ukuzwiswa ubuhlungu lokho okusuke kuxhashazwa.

Izinto ezixhashazwayo kuvamise ukuthi zificwe yilaba abazixhaphazayo sezivele
zikhona noma seziwumthamo obanakalayo okuwukuthi , umnikazi walokho
okuxhashazwayo usuke esezincoma ngomthamo womsebenzi asuke esewenzile,
okuwukuthi , lo msebenzi osuke uxhashazwa usuke uxhashazwa abantu
abangawusebenzelanga nabangawuzweli ubuhlungu.

Zininingi-ke nokho izinto ezixhaphazwayo lapha emhlabeni, isikhathi siyaxhashazwa,
izimpahla ziyaxhashazwa, imali iyaxhshazwa, umsebenzi uyaxhashazwa, kanjalo
nomuntu naye uyaxhashazwa.

Isikhathi esiningi izinto ezixhashazwayo zixhashazwa ngoba zingakwazi
ukuziphendulela noma ukuzilwelwa kulabo abasuke bezixhaphaza. Kodwa kukhona
abanye abantu abazibeka bona engozini yokuthi baxhashazwe abanye abantu. Uma
umuntu ezibeke engozini yokuxhashazwa, imvamisa indlela axhashazwa ngayo naye
usuke kukhona akuzuzayo ekuxhashazweni kwakhe, kodwa okugcina ngokukhala
nokugedla kwamazinyo uma umuntu ovume ukuxhashazwa engasakutholi abekulindele
emveni kokuxhashazwa kwakhe ngokuvumelana nalo obemxhaphaza. Akuzona zonke
izikhathi lapho umuntu oxhashazwayo akezwa ubuhlungu ngaso lesosikhathi
exhashazwayo, kodwa kwesinye isikhathi, uxhashazwa ngendlela naye emthokozisayo,
okuwukuthi imiphumela kuphela eba mibi.

Leligama xhaphaza livamisile ukuzwakala livela kubantu besifazane beqonde ukuveza
ukungethembakali kwabafana ikakhulukazi uma owesilisa ecela ukuba kwenziwe
izivumelwano ezithize nalo wesifazane.

Kumele angabe wonke umuntu uyaqonda ukuthi yonke into inomnikazi wayo lapha
emhlabeni, ayikho into emane yazivelela nje kodw yonke into idaliwe, okusho ukuthi
uma idaliwe, inomuntu owayidalayo, ngisho nemvelo eyaziwa ngokuthi izivelele
inomdali noma umnikazi wayo. Kanjanlo-ke nomuntu unomnikazi wakhe akamdalile
okuwukuthi umdalele ukufeza eyakhe inhloso ngaye lo muntu akamdalile.

Umhlaba ungokaJehova nokugcwala kwawo, izwe nabakhileyo kulo. Amahubo24:1
Anazi yini ukuthi niyithempeli likaNkulunkulu nokuthi uMoya kaNkulunkulu uhlala kini
na? Uma umuntu echitha ithempeli likaNkulunkulu, uNkulunkulu uyakumchitha yena,
ngokuba ithempeli likaNkulunkulu lingcwele, niyilo-ke nina. 1 KwabaseKorinte3:16-17

…nokuthi anisibo abeni na? Ngokuba nathengwa ngenani elikhulu….
1 KwabaseKorinte6:19-20


Uma umuntu edaliwe, kumele aphile ngendlela efunwa yilo adalwe nguye, uma
kungenjalo , lokho kusho ukuthi sekuwuqala kokuxhashazwa kwalo onguMdali wakho.

Uma into idaliwe yenza intando yalowo oyidalie, okuwukuthi;

Yazisa uyihlo nonyoko, ukuze izinsuku zakho zibe zinde ezwei uJehova uNkulunkulu
wakho akunika lona.

Ungabulali
Ungaphingi
Ungebi… U-Eksodusi20:12-15

Uma umfana ethanda intombazane efuna ukwenza ubuhlobo nayo akaceli ubuhlobo
entombazaneni kodwa ubuza imigudu akangayilandela ukuze axhumane nomnikazi
wayo ukuze ethule udaba, futhi naye akamane azihambele nje , naye ngoba unomnikazi
wakhe, ubikela abanikazi bakhe bona ebese bemtshela imigudu efanele yokufinyelela
kubo kwentombazane akayithandayo.

Uma kwenzekile laxhoshwa libhekile intando yoMdali ithi:

“Uma umuntu eyenga intombi engesiyo ingoduso, alale nayo, uyakuyilobola ibe
ngumkakhe. Uma uyise ala impela ukumnika yona, uyakukhokha imali elingene
nokulotsholwa kwezintombi.” U-Eksodusi22:16

Akudlalwa ngothando uthando luyinto enkulu enenani elikhulu ukwedlula zonke izinto
ezisemhlabeni, Umuntu odlala ngoTHANDO uyakujezela lokho ngoba uNkulunkulu
uluTHANDO, uThando wuNkulunkulu uqobo lwakhe, okusho ukuthi kumele
ucubungulisise kahle ngaphambi lokuthi ulikhiphe igama elithi thanda ikakhulukazi
uma ulibhekise komunye umuntu, yingakho noJesu embuzakaningi uPetru ukuthi
uyamthanda na.

Uzokhumbula phela ukuthi uke wathi uyamthanda kwathi uma sekumele afe lapha
kwakufa khona uJesu wamphika kathathu iqhude lingakakhali.

Bangaki abantu abathe bathanda abanye, kodwa kwathi sebeshade nabo babajikela
babadubula, abanye babashisa ngamafutha abilayo?

Bangaki abathe bathanda abanye kwathi sebebamithisile baphika izingane
ababamithise zona? Akesibuze kuwe- ke nje, wena uphi ubaba wengane yakho,
Wenake iphi ingane yakho , njengobo usushade nomunye nje uphi lo wokuqala
owammithisayo?

Njengoba uhamba utshela abantu ukuthi uyabathanda nje uzoshada nabo bonke yini?

Akudlalwa ngothando uma udlala ngalo uzokujezela lokho, kungcono ukusebenzisa
elinye igama uma kukhona okuzwayo emizweni yakho noma enhliziyweni yakho
kunokuthi usebenzise igama THANDA.

Igama THANDA liyinto okungeke kudlaleke ngayo ngoba ayilona ithoyizi ,

Noma nakha ubudlelwano benu akumele nidlalele ngakuleli gama, ngoba akunandaba
ukuthi ubudlelwano benu lobo ukuthi buphakathi komuntu omncane nomancane ,
omdala nomncane , noma omdala nomdala, kodwa ezintweni ezisetshenziswayo
ngenkathi kuqhutshwa lobo budlelwano aziwona amathoyizi ukuthi kungadlaleka
ngazo, uma into isisetshenzisiwe iphenduka ibe yisekeni unomphela ngoba ayisilo
ithoyizi ukuthi kungadlalwa ngayo noma kufezwe izinkanuko ngayo.

Izinga lokuxhaphaza abazali noNkulunkulu liya ngokuya likhulu kuze kube sengathi
kusemthethweni ukuxhaphaza abantu abadala. Ngikhuluma nje kusikkhathi esikuso
izingane ezincane zabafana nezamantombazane zizala mihla namalanga kusukela
eminyakeni eyisishiyagalolunye kuya phezulu. Uma lezizingane zisuke zisesesikoleni
noma la ziqeqeshelwa khona umsebenzi, Uma sezizele lezingane, zithatha izingane zazo
zizinike onina bazo noma ogogo. Zihambe zona ziyofuna abafana namantombazane
zizale ezinye, uma sezibuyile indle ezizisola ngazo kulelihlazo wukuthi zixhaphaze
abazali bazo ngokuthi zihambe ziyozala ezinye futhi. Sekuze kwafika isikhathi la khona
uma umama oshadile ekhulelwe ephakathi kweminyaka engamashumi amathathu kuya
kwamane izingane zimbabaze ngoba sezathatha ukuzala kwaba wokwazo khona
zingashadile.

Uma intombazane ithenjiswa izulu nomhlaba wumfana ethi uyayithanda ayimithise
aphike ingane ajike ayale, kusuke kungeyona intombazane exhashaziwe wumfana ,
kodwa intombazane iyona esuke ixhaphaze abazali bayo, kuphela nje isuke ibona
ucezwana kumfana yona ingazibeki cala , kodwa ibe inecala emhlabeni nasezulwini:
emhlabeni kubazali bayo nasezulwini kuNkulunkulu okoniwe ithempeli lakhe,

Ngoba noma angabe amashidi amahlophe athengwe wumzali wavula ilawu la
owayehlele ukuthi kudilizwe ithempeli likaNkulunkulu khona, uma imigudu efanele
ingalandelwanga nabazali banecala emhlabeni nasezulwini .

Igama uThando aliyo into yokudla, kanjalo nethempeli likaNkulunkulu aliyiyo into
yokudlala.

Uma intomabazane ibhanqe umfana nabanye abafana isuke ingamxhaphazi lowmfana ,
kodwa uyena lowomfana osuke exhaphaza abazali bakhe kanye noNkulunkulu,
akunandaba noma wasevelile noma wayengakaveli kubo kwayo, inqobo nje uma
imigomo imibandela kanye nemigudu ingalandelwanga wumfana yintombazane, abazali
bentombazane noma bomfana.

Bonke abantu abazibandakanye ezindabeni zocansi ngaphandle komshado banecala
lokubulala.

Intombi kuthiwa iyintombi ngoba intombi isuke ingabulawanga, okuwukuthi, igazi layo
lisuke lingachithiwe.

Igazi linomphefumulo, umphefumulo uhlala egazini, ukuchitheka kwegazi kusho
ukuphuma komphefumulo, umphefumulo uwumuntu.



Ngokuba umphufumulo womzimba usegazini; …

Ngokuba umphefumulo wenyama yonke, igazi layo linhlangene nomphefumulo
wayo;…Ulevitikusi17:13-14

Umuntu wesifazane udalwe waba nempilo ephidwe kabili, okusho ukuthi ; kufike kube
yintombazane le esikwaziyo ukuyibona ebese kuba yintombi le esingakwazi ukuyibona
yona.

Intombazane inegazi layo la kuhlala khona umphefumulo wayo ukuze iphile, kanjalo
nentombi inegazi layo lakuhlala khona umphefumulo wayo ukuze iphile.

Impilo yentombi ibucayi kakhulu kakhulu kunempilo yentombazane ngoba kuyenzeka
intombazane ilimale yophe, kodwa ingafi, kodwa intombazane uma nje ike yalimala
yopha iyafa. Intombi isentombazaneni.

Lokho kusitshela ukuthi kungenzeka ukuthi intombazane ihambe isiyithuna noma
isiphethe isidumbu sentombi efileyo ngaphakathi kwayo. Isikhathi esiningi intombi
ibulawa yisenzo sokuzibandakanya ebudlelwaneni bocansi.

Ayikho futhi indlela ephephile yokwenza ucansi ukuze intombi ingafi, ngoba noma
angabe intombazane isebenzise ijazi noma ihlele umndeni ngaphambi kokuba
ixhaphaze umzali wayo noNkulunkulu, kodwa intombi iyafa.

Noma sekwenzekile yakhulelwa , yase ithi ukukhululwa bekungahleliwe, igazi
elikhishwayo ngenkathi ihushula isisu, linomphefumulo, liwumuntu, lokho kusho
ukubulala umuntu. uMdali wakho uthe : ‘ungabulali” Ngakho-ke uma useke walala
noma wahushula, unezidumbu phansi osewazibulala., ungumbulali.

Okuwukuthi uma intombazane iqhubeka nokuzibandakanya nezocansi, kusuke
sekuyisenzo sokubulala into ivele isizifele. Lokho-ke kukuchaza njengombulali
ongenanembeza (serial killer)
Lokho-ke kusitshela ukuthi isinyathelo sokuzubandakanya kwezocansi kuyisinyathelo
sokukhipha umphefumulo wentombi esentombazaneni.

Uma intombazane ithatha intombi iyihambise kumfana ifike iyibambe iyibambele
umfana , ebese umfana eyigwaza eyibulale, uma isimithi , umfana wayishiya nesisu,
isuke ingaxhashazwanga, kodwa yiyona exhaphaze abazali bayo kanye
noNkonkulunkulu.

Noma angabe umfana ukuzalise izingane eziyishumi wase eshada nomunye
akakuxhaphazi , kodwa wuwe oxhaphaza abazali bakho.

Nakuba igazi lentombi kumele lichithwe, kodwa nakuba kunjalo alichithwa ngaphandle
komshado.

Kunemigudu okumele ilandelwe uma kuzochithwa igazi lentombi entombazaneni.

Intombi ezobulawa kumele kube yile ekhethwe wuNkulunkulu wathi indoda ayishiye
uyise nonina iyonamathela kuyo babe nyamanye.

Abazali mabanikezelane ngezingane zabo ngosuku lomshado bashadiswe, ebese
intombi nabanikazi bayo, ihambe iyofa yazi nabo bazi ukuthi isiyofa , kodwa isizophila
isiyinyamanye nendoda yayo, ebese iphenduka umufi + azi= umfazi. Ibe wumfazi
womkhwenyana wayo. Uma intombi isifile ayisadingeki kubazali bayo, ngoba
sekungeyasemshadweni. Kodwa namhlanje sinabazali abahleli nezidumbu namathuna
ezintombi.

Wena ngoba usushade nomunye nje, kodwa kahle kahle unyamanye nalo owamchitha,
noma owachithwa igazi wuye.

Umshado owabantu abachithelwe igazi wuJesu, Umshado ungenye yezinkonzo
eziwumfuziselo kaJesu neBandla. Kwafa uJesu kwazalwa iBANDLA. iBANDLA-ke noma
lisemhlabeni ubuzwe bali yizulu.

Uma ungayilandelanga imigudu efanele ukufika emshadweni, usilelwe ukuxhumana
noJesu, usulelwe icala lakho lokuchitha igazi ungachithelwanga igazi wuJesu
esiphambanweni.

Inhloso yomshado ivela kuNkulunkulu, umshado uyinto engcwele. Noma abantu
bangaba nezizathu zabo zokungena emishadweni , kodwa isizathu sokushada sivela
kuNkulunkulu.

Kukhona izinto ezenziwa abantu bezisusela emvelweni nasemizweni yabo, kodwa
okuseqinisweni kuwukuthi lezozinto abazenzayo zasungungulwa wuNkulunkulu
ngenhloso yakhe, okuwukuthi zisezwini likaNkulunkulu ukuthi zenziwe. Uma into
isezwini kusobala ukuthi kumele yenziwengendlela echazwe ngayo ezwini
likaNkulunkulu.
Kodwa nakuba kunjalo abantu bayaqhubeka benze izinto ezivela ezwini likaNkulunkulu
bezenza belawulwa yimvelo nemizwa yabo ngoba vele ayikho into ebavimbayo.

Nakuba abantu bengenza izinto ezisezwini ngezizathu zabo, kodwa imiphumela
yokwenza lezozinto ulawulwa yimvelo nemizwa ayifani nemiphumela etholakala uma
umuntu enza lezozinto elandela isizathu esibekwe wuNkulunkulu.

Izizathu zabantu zokushada:
   Abanye bashada ngoba bephoqwe abazali babo ukuthi bashade.
   Abanye bashada ngoba befuna umuntu uyobanakekela uma sebebadala noma
   sebegula.
   Abanye bashada ngoba banemali eningi.
   Abanye bashada ngoba bafuna ukuba negama ezweni.
   Abanye bashada ngoba bathi bafuna ukuvusa umuzi wabazali babo.

Izizathu zikaNkulunkulu zokushada:
Esinye sezizathu zikaNkulunkulu wukuthi kuzalwe izingane zikamoya, okuyinzalo
engcwle.

AkusiMunye osenzileyo, okusele kuye umoya wethu na? Ufunani lo Munye? Inzalo
kaNkulunkulu. UMalaki2:15

Zonke izinkonzo ezibekwe wuNkulunkulu ukuba zenziwe, kumele kuthi uma zenziwa
kukhulekwe kuye yena ezenzelwa yena ukuze kwenzeke lokho okufunwa wuye
ngaleyonkonzo.

Okuwukuthi uma kuyokwenziwa inkonzo yasekamerweni , kumele kube nomkhuleko
owenziwa yilabo abayoyenza emveni seliboshiwe ifindo likasofasilahlane phambi
kwakhe uNkulunkulu, ibandla, umphakathi, kanye nabazali nomndeni.

Isizathu ukuze kube nomphumela ofunwa wuNkulunkulu. Okuhlanganiswe
wuNkulunkulu kunoMoya wakhe kukho, lokho-ke kwenza kube lula ukuzaleka kwecebo
lakhe okuwukuthi inzalo kaMoya, engcwele nemukelekayo kuye.

Umbuzo osalayo uthi-ke lenzalo ezalwe ngenxa yemizwa nemvelo inobani phakathi
kwayo, ingekabani futhi ingenjani? Uma kuyena uNkulunkulu umnikazi wayo, ubani
omunye ngaphandle komubi? Uma yena loyo engomubi uzala inzalo enjani?

Zingaki izingane ezizalwe emveni kokuba umuntu elale nomunye ngenxa yokuthi
uselawulwa umoya womubi omngenile ngenkathi ebuka izithombe wavukelwa imizwa?

Zona lezo ngane ezizalwe kanjalo azizaliselene, futhi azizele yini kuyimanje? Lokho
kusitshelani ngezingane zalesisikhathi? Ezikabani ? Zifeza inhloso kabana?

Ubani ubaba wazo okwangena kwasebenza umoya wakhe ngenkathi zakhiwa?
Kuleminyaka eminingi eyadlule kuke kwaba nobufakazi obabethulwa emisakazweni
bethulwa abantu ababeyizikhonzi zikaSathane, bebeka ukuthi babengenwa yinyola
ngaphakathi kwesibeletho , uma isingaphakathi ifike iphenduke ebese ikhanda layo
ilibhekisa ngalapha eqhmuke ngakhona. Babethi uma beqhubeka nobufakazi babo bethi
lokho kwakwenza ukuthi uma umuntu wesilisa owenza inkonzo nalo wesifazane
acabange ukuthi ungena kuyena kanti ungena emlonyen wenyoka okwakwenza ukuthi
azizwe enokuthokozela inkonzo kakhulu, babethi uma beqhubeka bethi; lokho
kwakuhloswe ngakho ukuthi kudluliselwe umoya wokuba yisikhonzi sikaSathane, athi
uma esewuthathile lo wesilisa abese ewudlulisela kwabanye akalala nabo.

Uma kuwukuthi yayikhona into enjengaleyo , nanokuthi uma kuwukuthi isaqhubeka
namanje, kusala umbuzo othi kazi izingane ezizalwa namhlanje ezikabani, nanokuthi
kazi zenza msebenzi muni zibe ziwenzela bani?



Kazi abantu abashade nabantu abanenyoka ngaphakathi kanti abalandelanga imigomo
yenkonzo babona kanjani ukuthi bangaphansi kwalesosimo.

Kazi laba okuthiwa abazitholi izingane yingoba bengazitholi ngempela yini noma
ziyadliwa zithathwe kuyokhandwa izikhonzi zikaSathane ngaleyombewu?

Lezingane ezizalwe hhayi ngentando yeNkosi , kodwa ngentando yomoya omubi,
akuzona yini ezicwile ezidakamizweni, ezigcwele emajele, ? Akuzona yini esezisiyekile
isikole, neseziphila ngemali etholakala ngayo leyondlela yomubi?

Ayikho imizamo ezanyiwe ukuze kunqandeke lesosimo, uma ikhona ucabanga ukuthi
leyomizamo yehlulekiswe yini?

Lemishado eyakheke ngaphansi kwalesisimo , akuyona yini eyalaba asebahlukanisa,
abanye babo asebahlukana ngokuthi babulalane ngezindle ezahlukene.

Zingaki izingane esezahlula induku, zazalwa kanjani?

Ziningi ezikaNkulunkulu izizathu kodwa asime kulesi okwanje.