Docstoc

Pahoppu Panggoaran

Document Sample
Pahoppu Panggoaran Powered By Docstoc
					   1. Pahoppu Panggoaran
Dang tarhatahon boha las roha ni NaiMaralus dung sidung martelepon siMaralus
sian Jakarta. Paboahon naung sorang pahompuna. Tolu ari manipat, marpiar-piar
las nirohana mangkatahonsa tu angka donganna. Marbarita sosungkunon ibana di
parpunguan nang tu ganup hombar balokna. Martahi ma nasida nadua, naiMaralus
dohot tungganedolina mangebati pahoppuna. Domu tusi, martading hata nasida
palumehon jabu, naeng tu di Cikarang. Ima inganna ni si Maralus.

Hanget ni rohana do asa dipaboa-boa tu saluhut. Tu parari kamis donganna
sapargurendean tong martading hata, donganna saparonanan, nanaeng laho
mamereng pahompuna. Dang hapalang tahe. Pahompu panggoaran nunga sorang,
jala goar ni pahoppu na on nama pakkeon ni ibana tu joloan on.

Nian, nunga adong pahoppuna sian boru, jala goar ni pahoppu na ondo dibahen
ibana goarna. Ido sada panjouon di halak batak. Molo pinakke goar ni pahoppu sian
boru, digoari ma Oppung ni si adona, ninna. Alai molo pahoppu sian anak do, didok
ma OppuAdona.

Ninna rohana jouon ni donganna pararikamis ma OppuRomaHamonangan. "Ikkon
si Roma Hamonangan do goar ni pahompungki" ninna ibana tu parumaenna
naiPaimaon--hatihai.
"Ai nunga monang au marpahoppu sian anak nang sian boru, molo naeng tambaan
mu goarna, tambai hamu, alai goar sian oppungna, ima" ninna ibana manguduti.

Hatiha martelepon boruna siakkangan sian Jerman, dipaboa ibana do naung sorang
pahoppuna i. "Naeng tu Jakarta au inang, nga sorang paramanmu" ninna ibana.
Ondo boruna siakkangan, jala maringanan di huta ni opputta siNomensen,
mangihuthon niolina ala karejo di san.

"Ima tutu inong, attong hutongoshon pe pasitikketmu dohot bapa" ninna boruna par
Jerman i. Dungi lalap masirarian ma nasida, bohama na marboru on, sude do
dihatai. Sian rumang ni pahean ni pararikamis sahat rodi partaonan ni Naimaralus.
***

Pungkul sia manogot ni ari minggu, marhobas-hobas be ma nasida lao borhat tu
gareja. Mar-Jas baget do anggo amaniUssok, si Maralus. Marsitabolan tu siamun
huhut mamanghe miak na hunsus. Songoni nang naiUssok, dipanghe kabaya
pengantin i. Uli ma tahe idaon nasida nadua. Dungi dibaen ma baju na bontar di
siussok, anak panggoaran i. Dang hatinggalan, songoni do nang amaniMaralus,
denggan marpahean. "Hu pajaithon jas on anaha, holan tu ari pandidion ni
pahopunghon do" ninna ibana tu si Maralus huhut dililithon dasina tu rungkungna.
Marsiberengan nasida nadua.

Tutu ma nian, songon na mulak poso do amaniMaralus. Tangkup mamaekke jas
nabaru i.

"Bah, marpahean ma ho attong oppuHamonangan" ninna amaniMaralus tu niolina.
"Daung!, hamu ma marminggu, di jabu ma au, pasingkophon sipanganon on" ninna
mangalusi.
"Dang songoni nian na ruhangku bah, las ma roham. Dang pataridahononmu na so
singkop nadibagasa rohami" ninna amaniMaralus ala di ida songon na so tabo idaon
bohi ni naiMaralus.
"Olo ma dah, so binoto amaniHamonangan on, tung so diboto nadibagas roha on"
ninna mangalusi.
"Ahai bapa, uma, songon na marhata metmet hamu" ninna siMaralus ala dibege
natorasna marhata metmet.
"Nion do dah, omak mon, dang dohot ninna tu gareja ala naeng makkobasi
sipanganon" ninna amaniMaralus.
"Ingkon marminggu do ho umak, asa rapmarpoto hita dohot amantaPandita innon"
ninna si Maralus.
"Anggo sipanganon i, lok si Lamtiur paturehon, ai holan mangalompa indahan nama,
anggo ikkanna rupe na sikkop do sian katering" ninna muse, alai dang diboto aha na
dibagasan roha ni inongna.
***

Logu nasomal, nomor saratus opat pulu onom do attong anggo ende di pandidion
nabadia, paian ma di hami. Dungi jonjong be ma natoras na maboan dakdanak
sididion. Holan diendehon sa ayat, tor mangissurut naiMaralus tu pudi. Laho haluar.
"Tudia ho, pandidion nama" ninna amaniMaralus marhusip. Dang dialusi, sip.
Jonjong ma na mamboan dakdanak sididion, mangalusi sukkun-sukkun ni pandita i.

Geok do sipata molo binege akka goar ni dakdanak i. Habilangan jari do na mamakke
goar batak. Dang haru binoto, dia bossirna. Na maila do manang na alani beguaha.
Geokna muse, olo gabe goar jawa di baen amana. Ai da tung denggan ma nian molo
dibaen goar ni dakdanak i sian hata batak?. Godang hata batak na massai uli
mambaen goar.

Sahat ma tu siMaralus. Diboan ma siussok tu langgatan. Dibaen ma songon naung
nadiparguruhon nasida minggu na salpu. Dungi dijouhon amantaPanditama goar ni
siussok on. "Ale...Ale..." ninna, so jo satokkin. Dipadenggan muse harotas i. Huroa
hurang takkas dijaha amantaPandita i.
"Ale,...ale Jek... Luit... Bento Roma Hamonangan Sima...Tupang, hudidi ma ho..."
ninna amantaPandita i. Alani ganjang ni goar i, marudut tu toru panurathonon ni
marga nasida. Simatupang, gabe Sima..tupang. Mekkel suping pandita i. Gear ruas
umbegesa.

On do huroa na niarsakkon ni NaiMaralus.
Dua ari na salpu nga didok ibana tu siMaralus, "Ai goar beguahai, maol jahaon ni
deba, ia tung na mura-mura i ma nian dibaen", ninna ibana. Ido, si Jacqluit Bento
Roma Hamonangan do goar ni si ussok on dibaen siMaralus. Nga leleng diparsitta
ibana goar Jacqluine, alai goar ni borua do on. Hape ala si ussok do na tubu, gabe
dibaen ibana ma si Jacqluit.

Ro do tu pikkiranna, jouon ni donganna pararikamis ma ibana, OppuJekluit, ia so i
OppuBento. "Bah, disilanghu muse, haduan..., baenonna ma hae Oppu Jek Luit
Bento au?" ninna ibana marungut-ungut.

Padua hali on ma ibana haboratan digoar di pahoppuna. Hatiha sorang si unsok di
boruna parJerman i, nunga didok asa goar Batak di baen. Alai asing pikkiran ni
naiMaralus, asing muse do dibaen helana. Dibaen do goarna Jaugher. "Asa goar
Jerman, Inong" ninna boruna, naiJaugher. Andorang so sorang pahoppu panggoaran
si Jekluit, Oppung ni siJouher Karo do tarbarita goarna. Ala par Berastagi marga
Karo-karo do helana. Tutu ma nian, tung marsak do rohani naiMaralus. Sian
Oppung ni si Joker Karo gabe Oppu Jek Luit Bento Roma Hamonangan. "Tippas..."
ninna naiMaralus

				
DOCUMENT INFO
Shared By:
Categories:
Tags:
Stats:
views:8
posted:10/6/2012
language:
pages:3