Suu Kyi interview Journal ah chuahnak nawl an pe hna lo
Venus le Pyitukhit nih Suu Kyi interview an tuahmi Journal ah chuah an timh nain ralkap
cozah nih chuahnak nawl a pe han lo. Ca chuahnak lei ttuanvo ngeitu hna nih Suu Kyi interview
aa telnak hi an hlawt piak hna. A sinain NayPyidaw um ralbawi hna nih cun Suu Kyi he
biaruahnak kong hi tlamtling tein an rel. “ Suu Kyi he biaruahnak kong hi mipi nih cun relnak
nawl an hmu lo nain ralbawi hna nih cun tlamtling tein an rel. Hi interview ahhin Suu Kyi nih
ramkhel lei a hmuh ning le hmailei zeitin kan kal lai ti kong aa tel” tiin Naypyidaw um riansang
tlai pakhat nih a chim. Ramchung media hna nih Suu Kyi interview an tuah lio i an halmi ah
NLD dirhmun, kumzabu 21 Panglong tonpumhnak le zapi rualremnak, 2010 thimnak le 1990
thimnak hmuhning hna telh in ramkhel lei, chawkhel lei le zatlang kong hna aa tel. “ Suu Kyi
interview kan tuah ruangah man khiah khawh lomi thawngpang ralkap cozah nih a lak in an
hmuh” tiin Journal editor pakhat nih a chim. Cattial minthang pakhat nih cun, “ Atu bantukin
ralkap cozah nih Suu Kyi interview Journal ah langhter an duh lonak hi anmah nih hi kong rel in
Suu Kyi namnehnak kong ttial an duh caah a si” tiin a chim ve.—Irrawaddy
Cianh-khine-zi nih teinak hmu party taza an cuai hna
Cianh-khine-zi party le ramkhel party hna cu kap khat le kap khat taza an i cuai. “ Phung ning
loin Cian-khine-zi nih taza a kan cuai hmasa caah kanmah lei zong nih tazacuai tthan kan timh
hna” tiin Shan Democracy Party ( SNDP) in Vice-Chairman Aung Si nih a chim. SNDP party in
teinak a hmutu Sai Mon cu Cian-khi-zi party i Dr. Sai Kham Hlaing nih, “ Shan hriamtlaibu
(SSA) nih an bawmh ruangah teinak a hmuhmi a si. Cu lengah thimfung thlaknak hmun pawng
ah milung laaknak a tuah fawn” tiin taza a cuai. Thlanglei-Shan hriamtlaibu (SSA) hi ralkap
cozah he kah daihnak a tuahmi a si i thimnak ah zalong tein thimfung thlaknak nawl a ngeimi an
si tiin SNDP party he a naihniammi pakhat nih a chim. “ Kan ruahnak ahcun teinak kan hmuh
chunh te he parliament ah kal kan i tim. A sinain atu bantuk taza cuai kan tonmi ruangah kanmah
lei zong nih taza cuai tthan kan timh hna. Biaceih zung biakhiahnak hi zeitluk in dah a hmaan ti
kan zoh te lai” tiah Aung Si nih a chim.—Irrawaddy
Norway ah Kawlram mi hna nih an duhnak an langhter
Norway cozah ni Kawlram chung chawkhel rian a ttuanmi ngol dingin kan hnu nithum ni ah
Kawlram mi hna nih Oslo khua, Norway Parliament zung hmai ah rawl-ulh in an duhnak an
langhter. Duhnak a langh termi hna hi minung 15 an si i, a kih -20*C lak ah zing 8 in zan 10:30
tiang ei loin an duhnak an langhter. Duhnak langh ternak ah aa tel vemi Thu Ring nih, “A kih -20
lah ah duhnak langhter a si tik hin a kik ngai. Rawl cu kan ei lo nain ti cu kan ding ko. A kih tuk
caah tisa kan ding. Suu Kyi hmantlak kan i put. Mirangca in ttialmi vampang ah kan tar hna. Kan
thut ahcun kan khua a sih tuk caah kan i chawk peng. Hiti duhnak kan langhter hnawhchan hi
Norway paliament le cozah sinah kan pek. Cu lengah hiti duhnak kan langhternak a rak zohmi
vawlei cung ram 10 in Kawlram kong a cawlcangtu hna he i bawm in Joint statement kan chuah i
Norway PM sinah kan kuat. Zing 8 tluk ah Noway paliament he tonnak kan ngei i, zei ruangah a
tu bantuk in nan duhnak nan langhter tiin a kan hal tikah Kawlram ramkhel kong fianhnak kan
tuah. A tubantuk Kawlram chung ah Norway ram nih chawkhelnak nan tuah ahcun mipi caah
santlaihnak pakhat hmanh a um lo. Ralkap lutlai calawng a si tiin kan chimh hna” tiah a chim.
Norway nih Kawlram chung chawkhelnak caah US$ nuai 5,000 tluk a hman.—DVB
Bom puah lio hmanthlatu kum 8 thong an thlak
Kum 2010 titoih puai bom a puah lio video le hman a thlatu Sithu Zeyar cu kum 8 thong thlak
dingin bia ceih zung nih bia khiahnak a tuah. A sinain biaceih zung ah nawlnak ca kan ttial tthan
lai tiin Situh sihni nih a chim. Sithu hi bom a puahnak he pehtlai in video a thlakmi hi an zumh lo
caah an tlaihmi a si. Hiti biahalnak le hlathlainak an tuah tikah Sithu hi Thailand ah media
training akai tiin le DVB thlawng la hna he pehtlaihnak a ngei tiin cozah lei nih sual an phawt.
Kan hnu April 15 i Yangon khua, Kandawgyi kam X20 ti toihnak inn bom a puah ruangah an rak
thlaih. Amah lawng siloin a pa Zeyar zong nawlngeitu hna nih an tlaih chih. Cattial thiam
minthang a simi Zeyar hi hmaithla January ah biakhiah piak a si ve lai. Cu lengah bom puahtu a
si tiin an tlaihmi Engineer Phyo Wai Aung zong Insein thong ah bia an ceih liopi a si. Pyo Wai
Aung hi Thai-Kawl ramri um hriamtlaibu hna he aa pehtlaimi a si i bom puah lio zongah
pawngkam zohtu ah aa tel tiin palik bawi zik Khin Yee nih a chim. A chung le nih Phyo Wai
Aung an tlaihmi hi mi an palh mi a si. Bom a puah lioah amah hi inn saknak ah a um tiin an
chim.—Irrawaddy
Kawlralkap le tlangcung hriamtlai an i kap
Karen ramkulh Myawaddy thlanglei um Phawmubawthah ah kan hnu nikhat ni ah fak ngai in an
i kap. Kawlralkap thilphor mawttaw le DKBA hriamtlai hna cu lam ah ruahlopi in an i tongnak
in hiti an i kahnak hi a si. Kawlralkap le DKB thlakhat chung an i kahmi ah tutan hi fakbik an i
kah a si i Kawlralkap lei in 8 an thi i 26 hma an pu. Hi ni tthiamtthiam ah Kawlralkap (Khah-
ma-yah 409) le DKBA hriamtlai an i kap i Kawlralkap lei in a thimi an um nain zeizat an thi ti
fiang in theih a si rih lo. Phalu khua zongah Khah-mah-yah 457 le DKBA an i kap i Kawlralkap
lei in 7 an thi i 12 hma an pu tiin DKBA nih thanhnak a tuah.
KNU nih hmunhma a laaknak Manepalaw ah tuthla 19-20 ah Kawlralkap le KNLA-202 fak
ngai in an i kap i Kawlralkap lei in a thimi an um nain kanmah lei a thimi kan um lo tiin KNLA
ralbawi Saw Myo Min Thu nih a chim. “ Tu ni slm 12 ah kanmah KLNA-202 le hriamtlai
komhbu hna i bawm in khah-lah-yah-106 he kan i kap. Nizan zing zongah khah-mah-yah-338 he
tlawmpal kan i kap i, zaanlei slm 5 ah Khah-mah-yah-343 he zong kan i kap tiin Saw Myo Min
Thu nih a chim.—KIC
France Nuhrinvo laksawng GRED an pek
Thai thlanglei um Kawlram mi hna rianttuannak le fimcawnnak caah rianttuantu Grassroots
Human Rights Education and Development ( GRED) bu cu France ram nih Nuhrinvo laksawng a
pek. GRED rianttuannak hi France cozah a lungtlin caah hi laksawng a peknak a si. Hi laksawng
kan hmuh ruangah kan i lawm. Nuhrhinvo kong rianttuannak ah thazaang a kan petu a si lai tiin
GRED director Chit Htoo nih a chim. France cozah nih The Human Rights Prize of The French
Republic laksawng hi 1988 kum in pek hram an rak thawk i, nuhrinvo ca rianttuanmi bu le
fimthiamnak ca a ttuanmi bu an pek hna. Tukum caah GRED le a dang bu 9 nih hi laksawng hi
an hmuh i, Kawlram chung um bu 2 zong aa tel ve. Tutan laksawng a hmumi Grassroots Human
Rights (GRED) bu hi 2000 ah an rak dirh i, Thairam um Kawlram mi hna nuhrinvo ca le
fimcawnnak caah biatak tein rian a ttuanmi bu a si. A hlan ahcun Kawlram mi lawng nih an rak
thawk nain a tu ahcun Thai, Europe le Kawlram mi tiin chungtel 86 an si cang.—Irrawaddy